სასარგებლო რჩევები
რჩევები ბავშვთან ერთად წიგნის წასაკითხად
ბავშვში კითხვის სიყვარულის გასაღვივებლად, პროცესი საინტერესო თამაშად უნდა ვაქციოთ. აი, რამდენიმე პრაქტიკული რჩევა, რომელიც ამაში დაგეხმარებათ:
დაიწყეთ ყდიდან
წიგნის გაცნობა დაიწყეთ გარეკანზე გამოსახული ილუსტრაციის გარჩევით. ჰკითხეთ ბავშვს, მისი აზრით, რის შესახებ შეიძლება გვიამბობდეს ავტორი.
გააცანით ილუსტრატორი
ბავშვს მხოლოდ ავტორი კი არ დაუსახელოთ, არამედ ილუსტრატორიც გააცანით. ერთად დაათვალიერეთ და შეაფასეთ წიგნში მოცემული ნახატები.
მიეცით არჩევანის უფლება
უმჯობესია, ბავშვმა თავად აარჩიოს წასაკითხი წიგნი თქვენ მიერ შეთავაზებული 2 ან 3 ვარიანტიდან. ეს მას დამოუკიდებლობის განცდას მისცემს.
გამოიყენეთ პაუზები
კითხვისას კარგია შეყოვნება რაიმე გარდამტეხი ან საინტერესო მომენტის წინ — ეს დაგეხმარებათ დარწმუნდეთ, რომ ბავშვი ყურადღებით გისმენთ და ელოდება გაგრძელებას.
აკონტროლეთ დრო
იკითხეთ მანამ, სანამ ბავშვის მხრიდან არის ინტერესი. თუ ატყობთ, რომ ყურადღება გაეფანტა, ჰკითხეთ, აქვს თუ არა გაგრძელების სურვილი, და ძალას ნუ დაატანთ.
გაიხსენეთ განვლილი
შემდეგ ჯერზე, სანამ კითხვას გააგრძელებთ, ბავშვთან ერთად ეცადეთ გაიხსენოთ წინა შეხვედრაზე წაკითხული ამბავი.
სასურველი კითხვები კითხვის პროცესში
კითხვის პარალელურად ბავშვთან დიალოგის წარმართვა საუკეთესო გზაა ემპათიის, ლოგიკისა და წარმოსახვის განსავითარებლად. აგრეთვე ასეთი ცოცხალი ღია საუბრებით გაამყარებთ ბავშვთან ემოციურ კავშირს და თქვენს შორის მეგობრობის ჩამოყალიბებას შეუწყობთ ხელს.
- რას ფიქრობ, რას განიცდის ესა თუ ის გმირი, როცა მას ბურთი წაართვეს, მეგობარმა დასცინა ან დედა ავად გაუხდა?
- შენი აზრით, ახლა რა ხასიათზეა ეს პერსონაჟი და რატომ?
- როგორ ფიქრობ, რა დაეხმარებოდა ამ გმირს, რომ თავი უკეთ იგრძნოს?
- შენ თუ გქონია ოდესმე მსგავსი განცდა ან შემთხვევა?
- რას ფიქრობ, რატომ მოიქცა ასე ესა თუ ის პერსონაჟი? რას შეეძლო გამოეწვია მისი ასეთი მოქმედება?
- სწორად მოიქცა თუ არა ეს გმირი და შენ როგორ მოიქცეოდი მის ადგილას?
- როგორ ფიქრობ, შეიძლებოდა თუ არა ამ პრობლემის სხვანაირად მოგვარება?
- შენი აზრით, რისი თქმა უნდოდა ავტორს ამ ისტორიით, რას გვასწავლის ეს წიგნი?
- რას ფიქრობ, რა მოხდება შემდეგ?
- შენ როგორ დაასრულებდი ამ ამბავს, სიუჟეტის შეცვლა რომ შეგეძლოს?
- ეს პერსონაჟი შენს კლასში ან ბაღში რომ მოვიდეს, რაზე დაელაპარაკებოდი, რას ჰკითხავდი მას?
- ამ ისტორიიდან რომელიმე ნივთის ან ჯადოსნური ძალის შეძენა რომ შეგეძლოს, რომელს აირჩევდი? და როგორ გამოიყენებდი ჯადოსნურ ძალას მისი არჩევის შემთხვევაში?
რას ვკითხულობთ კლუბში
ნახეთ წიგნების სია ასაკის მიხედვით.